Una goccia di poesia:spirito napoletano in versi

© 2007-2010 I testi sono proprietà dell'autrice Gianna Caiazzo e non possono essere modificati.

La riproduzione, la pubblicazione e la distribuzione, sono vietate per uso commerciale

e laddove non venga espressamente indicato il nome dell'autrice.

Guardale in jpeg! (napoletane)

Guardale in jpeg! (italiane)

Guarda la raccolta completa sul blog dell'autrice.

Fantasia.

Chell'ogna 'e luna c' 'a stelletella areto

me pare 'na parura 'e giujelliere

'a luna d' 'o mmetallo cchiù lucente

'a stelletella d' 'a chhiù preziosa preta.

  21 maggio 2mila9

'A voce 'e ll'anema

Nun so' poeta nun songo nu scrittore

nunn'è nu nomme ca t'accarezza 'o core

ma 'sti pparole ca scorreno 'int'e mmane

se fanno museca e volano luntano.

  3 maggio 2mila9

Fessobbucco

Uno 'e 'sti juorne me scrivo a fessobbucco

m'avoto e giro e 'o veco a tutte parte

vogl'i' cercanno tutta chella gente

c'aggio perduto tantu tiempo fa

M'aggi' 'a 'ntallia' pur' i' nu paro d'ore

i' spuculianno dint'e fatt'e ll'ate

aggi''a 'nfizza' nu nomme dint'o spazzio

e aggi'a vede' 'a risposta ca me da

Voglio capi' comme s'è  ffatto chillo

a chi cunosce chella tala perzona

quanta cumpagne tene 'a cumpagna mia

'e tutte cose me vogl'i' a 'ntrica'

Aggi' 'a paria' 'ncopp'e bacheche 'e ll'ate

vaco scrivenno quatto fessarie

'na resatella 'na parola 'e spicce

pure 'e nuttate nce voglio passa'

'Int'o prufilo metto 'a fotografia

tutt'a famiglia cu mugliera e figlie

pecchè chi 'a vede nun se fa illusione

songo impegnato e nun se po' allarga'

Nun me voglio senti' 'nferiore  a ll'ate

me votto dint'o uebbo e statte bbuono

aggi' appara' 'na migliarata 'e ggente

e tutt'e juorne me l'aggi' 'a i' a cunta'

Me voglio fa' p'amice 'e meglie nomme

nun  me ne 'mporta si nunn 'e cunosco

'o nicessario pe' mme è ca quann'o ddico

'a tutte quante m'aggi' 'a fa' mmiria'

E nun fa niente si faticamme 'nzieme

si 'e 'ncontro tutt'e juorne 'ncopp'o posto

si a quaccheduno quanno 'o veco 'o scanzo

ma dint'a fessobbucco nce adda sta'

'Stu grande parlamiento virtuale

è 'n'invenzione ca me piace assaje

parla' 'a vicino mo s'è ffatto antico

i' so' moderno che nce pozzo fa'?

  1 maggio 2mila9

'O scarto

Patate' stamme 'a ssenti'

pecchè 'o ssaccio ca me siente

nun me fa' recchie 'e mercante

a quatt'uocchie amma parla'

E vabbuo' staje 'ndaffarato

ma nun t'aggio chiesto niente

sulamente 'na preghiera

nu minuto me l'he 'a da'

Forze mo nunn'è 'o mumento

stanno cose cchiù importante

i' mo t''o 'ccummencio a dicere

po' decide tu c'he 'a fa'.

Scanzame d''a ggente 'e niente

d' 'e meriusi e d' 'e ssanguette

'a chi fa 'na bbella faccia

e s'avota a rruseca'

Scanzame d' 'e sicciaiuole

ca t'asseccano 'int'all'osse

a chi pare muchiesurdo

ma è 'o peggio ca nce sta

dice ca sto esaggeranno

ch'issa rimmane' tu sulo?

tu accummience a fa' stu scarto

po' vedimme chi nce 'a fa.

 28 aprile 2mila9

'E llancette

Se cagneno e se scagneno

cumme ddoje guardie 'a reggia

se 'ncontrano,se scontrano

mo girano p' 'o llargo

marciano passo passo

se 'mpontano all'attenti

se passano 'a cunzegna

se mettono 'e rimpetto

mo fanno natu turno

'o giro se ripete

'a longa corre annanze

'a piccerella areto.

 17 aprile 2mila9

'A surpresa

Te sto fittianno 'a quanno si' arrivato

cu 'stu vestito a ffiore e 'a nocca 'nganna

te si' piazzato dint'o meglio posto

addo' è sicuro ca sarrai guardato

E i' te guardo,mentre passo e spasso

nun te pozzo leva' chist'uocchie 'a cuollo

'a tentazione è forte e me turmenta

'o desiderio cresce e nun me lassa

I' già te veco annuro 'int'a 'sti mmane

te sbatto forte primm'e te fa mio

vurria sape' che t'annascunne dinto

'e tutto chesto po' che mme rimmane?

Spero ca nun me daje 'na delusione

cumm'hanno fatto ll'ate primm'e te

tanti pprumesse,tanti bbelli pparole

ma po' nun m'hanno dato nient'e bbuono

Certo però,stavota nun ce casco

i' cerco 'e nun me fa' tropp' illusione

Stavota overo nun m'aspetto niente

a cunte fatte si' sulo n'uovo 'e Pasca!

   6 aprile 2mila9

Arriva 'o juorno

Nu paro 'e pennellate niro funno

scriziat'e janco 'ncopp'a nu foglio 'e cielo

cummoglie 'e suonne 'e nu munno d'uocchie

ancora chiusi 'ncopp'o suonno d'a sera

'Na sbavatura 'e russo saglie chiano

s'appoja 'ncopp'e palazze e rompe 'o nniro

s'arrampeca addo' 'e stelle ancora lùcene

'e stute a una a una e l'annasconne

'A luce a poco a poco allaga 'a notte

pazzèa cu 'e tinte c'ha 'mprestato 'o mare

po' all'improvviso 'na vampata d'oro

s'appicce 'int'e feneste e abbruce ll'aria!

 3 aprile 2009

'O genius loci

Se dice c'ogni posto tene 'n'anema

'na linfa ca le scorre 'int'o turreno

'a forza 'e nu richiamo misterioso

c'ammalia cumm'o canto 'e 'na sirena.

Nu ffuoco ca te marchia quanno nasci

'na fiamma c'arde senza fa' rummore

'na cosa forte cumma 'na catena

ca t'arravoglia fino a ca nun muore.

Se chiamma Genio ma nunn è cumm''a fiaba

cca' nun mbruscine 'a lampada e accumpare

ma s'annasconne,se 'mpregna dint'o core

nun si' padrone,cca si tu 'o schiavo!

  28 marzo 2mila9

'A penna

Dicette 'a penna :"Aggia cagna' mestiere

me sento stanca, moscia, sfaticata

'a quanno è asciuta mmiezo 'sta tastiera

me pare ca me vo' disoccupata.

Primme zumpavo allerta ogni minuto

'a nota,'o cunto,'a lettera,'e llezzione

'a quanno hanno 'nventato 'sta curnuta

nun so' cchiù 'a stessa,so' juta 'n depressione!

Dint'all' ufficio po' nun ne parlammo

ero 'a padrona e t'a cumannav'io

mo sto' jettata tra matite e gomme

tutt'a jurnata 'ncopp'a scrivania

P'e fatte tuoje però vuo' ascì cu' mme

so' stata zitta e te n'he apprufittato

quanno è 'o mumento t'aggia fa' vedè

saje che te dico? mo me so' seccata!"

 31 gennaio 2mila9

Uocchie dint’a guerra

Dedicata ai bambini

delle guerre di tutti i tempi.

Uocchie sperdute

dint’a pazzia d’o munno

dint’e mmane d’e gruosse

c’accussì gruosse nun songhe

uocchie stutate

dint’a luce d’o juorno

‘ncopp’a strada d’a vita

‘ncopp’o suonno ‘e nu suonno

 uocchie sgranate

dint’o scuro d’a notte

‘nfaccia ‘a faccia d’a morte

uocchie…uocchie ‘nfuse

‘ncopp’a miseria ‘e ll’ommo.

  14 gennaio 2mila9

Longa longa

'Na poesia longa longa, longa,

chiena 'e parole,longa, longa longa,

si me scervello m'a pozzo 'nventà

ma longa longa nunn 'a saccio fa'.

Ce aggio penzato ma nun ce riesco

nce metto'e strofe 'a rima e quacche punto

me sforzo,si però me rendo conto

ca chestu broro nun se po' allungà.

Forse sarrà pecchè m'e 'nvent 'e notte

cu ll'uocchie apierte dint'a stanza 'o scuro

mo aggio capito pecchè 'e ffacce corte

me piglia 'o suonno e ppo' ll'aggia taglià!

  21 novembre 2mila8

Nun me pare ajere

Vint'anne 'nzieme a tte,vint'anne 'e vita

ma nun me pare ajere si m'avoto

invece 'e vveco a uno a uno 'e juorne

d'ammore,arraggio, malotiempo e sole

ma sempe 'nzieme,sempe nnammurate

parti' d'ajere, me pare nu peccato!

 21 novembre 2mila8

'O lavoro mobilita l’uomo.

'O lavoro me fa male

l'aggio ditto e v'’o rripeto

si nun fosse p'’a campata

mommò me tirasse areto.

Haje a che ffà cu mille cape

chi 'a vò cotta e chi ‘a vò crura

tutt'’e juorne 'a stessa storia

tutt'’e juorne na jattùra.

Si acchiappasse dint'’e mmane

chi ha 'nventato sta cundanna

ce dicesse dint'all'uocchie

chello ca me sento 'nganna

Neh, titò, te riende conto

'e che t'he fidato 'e fà?

S'era faticà pe vivere

mo campammo a faticà!

 11 ottobre 2mila8

Autunno

Settembre,'a culla d'a frennesìa d'a staggione.

   21 settembre 2mila8

San Gennaro ha fatto ‘o miracolo!

San Gennaro ha fatto 'o ssuojo, mo me pozzo arrepusà

mo me sento cchiù tranquillo, quassì cosa aggio affruntà

quatto passe 'int'o burdello, mo me pozzo arrecrià.

Nu curteo 'e disoccupate? E vabbuò facit' 'e ffà!

Tutt’ 'o traffico bloccato? Ma che v'arraggiate a ffà?

Si mo chiove e v'allagate? Nu rimedio ce starrà!

San Gennaro nce ha penzato, mo si ttu ca t' he arrangià!

19 settembre 2mila8

‘A pizza.

Gesù, na rota 'e pasta

no piecuro o pullasto

si staje riuno o sazio

che te pò cumbinà.

N'addora 'e pummarola

chiena 'e vasenicòla

'o stommaco s'arape

quanno 'a sient'’e passà.

Na lava 'e muzzarella

nu sciuscio 'e graunella

sta rota 'e pasta e core

m'ha fatto 'nnammurà.

18 aprle 2mila8

‘O pavone.

Tu sì pavone e vaje facenno 'a rota

chin''e culore sta cora l'he regnuta

ma i’ veco ca siccomme fa 'a primm'acqua

chesta curella t'addeventa sciacqua.

10 febbraio 2mila7

'A mmiria.

 'A mmiria è comm'a tossa nun se pò trattenè

te trase dint'all'osse si n’ato è meglio 'e te

te fregne dint'’a panza ma nunn'o daje a vedè

-Ma comme, tene cinche e i' invece tengo tre?

E mo che ce aggia dicere? che m'avessa 'nventà?

C'’a vocca l'acqua vino pozzo fà addeventà!

Embè, saje che te dico? Siente sta nuvità:

ajere cacaje strunzo, m'ascette nu babbà!-

  5 dicembre 2mila7

Eterna contraddizione

Napoli,eterna contraddizione.

Sfacciatamente unica, meravigliosamente unica, vergognosamente unica.

Napoli, eterna contraddizione,croce e delizia,dolce odio,disperato amore.

Napoli,verità assoluta,culla e tomba della mia mente,della mia vita.

22 agosto 2mila7

‘E tifosi.

A Napoli, vulite fà 'a rivoluzione? Levatece 'o pallone!

Sulo allora v''e ttruvate mmiezo 'a strada assatanate…

Nun se joca? ‘O stadio è chiuso? Sta cadenno? 'O prato è 'nfuso?

S'arruvinano 'a jurnata, tutt' 'a vita è scumbinata.

Quanno parlano tra amice? Vuje l'avisseva sentì!

Troppo lento… troppo forte… nun ha visto proprio 'a porta!

Operai, disoccupate,pisciavìnnole e dottori..

Nun ce sta cchiù differenza: songhe tutte ALLENATORI !!

3 giugno 2mila7

‘A gente.

Dint’’a nu vico piccerrillo e scuro

'ncurniciato 'e balcune d'ogne taglia

me trovo ogne juorno 'a llà passanno.

Ogne juorno passanno votto l'uocchio

e ce veco na calma e na quieta

ma nun m'accorgo ca stanno areto 'e vetre

a te squadrà d'annanze  fino areto.

settembre 1985

Hai gradito queste poesie? Mi piacerebbe saperlo.

Inviami un segno del tuo apprezzamento usando la mail che trovi nella colonna di sinistra!

©2007-2010 I testi sono proprietà dell'autrice Gianna Caiazzo e non possono essere modificati

La riproduzione,la pubblicazione e la distribuzione,sono vietate per uso commerciale

e laddove non venga espressamente indicato il nome dell'autrice.

Dirirtti riservati sull'intero contenuto della pagina